រាប៊ី ប្រតិកម្មនឹងគេថា នាងត្រូវបានប្រើដើម្បីផ្ដួល ពេជ្រ សោភា

ខណៈនៅសហរដ្ឋអាមេរិកនៅឡើយ នៅថ្ងៃនេះ ស្រីស្រស់ រ៉ាប៊ី បានចេញមុខប្រតិកម្មទៅនឹងការលើកឡើងថា នាងត្រូវបានផលិតកម្មប្រើជាអាវុធ ដើម្បីផ្ដួលតារាចម្រៀងរបស់ហង្សមាស ពេជ្រ សោភា។ នៅលើបណ្ដាញសង្គមរបស់នាង រ៉ាប៊ី បានលើកឡើងថា ការលើកឡើងនេះ ខុសពីការពិតទាំងស្រុង ព្រោះថា ភាពជាក់ស្ដែងអ្នកសិល្បៈពួកនាង ស្រឡាញ់រាប់អានគ្នាណាស់ មិនដូចនឹងអ្វីដែលត្រូវបានលើកឡើងដោយទំព័រហ្វេសប៊ុកមួយនោះទេ។

នៅមុនប្រតិកម្មរបស់ រ៉ាប៊ី នាងត្រូវបានទំព័រហ្វេសប៊ុកមួយឈ្មោះ News4worl បានលើកឡើងថា "ឆ្នាំនេះល្បីថា Town ចង់យក RaBee មកផ្ដួល ពេជ្រសោភា រាជិនីប្រចាំហង្សមាស រាល់អ្នកដឹកនាំ និងអ្នកនិពន្ធរបស់ Town តែងតែព្យាយាមបញ្ចេញព័ត៌មាន ដើម្បី promote អ្នកចម្រៀងក្នុងផលិតកម្ម ហើយឆ្នាំនេះពិតជាបានផលមែន...តើអ្នកទាំងអស់គ្នា គិតថា RaBee អាចផ្ដួល ពេជ្រ សោភា បានដែល ឬទេ?។ ការលើកឡើងនេះ ត្រូវបានសាមីខ្លួនដែលត្រូវបានគេដាក់បញ្ចូលជាកម្មវត្ថុ បានអះអាងថា គ្រាន់ជារបៀបកេងចំណេញរបស់ទំព័របណ្ដាញសង្គមខាងលើប៉ុណ្ណោះ មិនឆ្លុះបញ្ចាំងពីការពិតរបស់ពួកនាងឡើយ។ នាងថា "ម្ចាស់ page នឹងចង់ល្បី ខ្លាំងណាស់មើលទៅ អ្នកសិល្បៈគេស្រលាញ់រាប់អានគ្នាណាស់ ប៉ុន្តែមានតែពួកនៅទីងងឹតមិនដែលហ៊ានបញ្ចេញមុខហ្នឹងទេ ប្រឹងអុជអាលដើម្បីអោយគេចូលមើលpageខ្លួនឯងច្រើននឹងបានចំនួន like ច្រើនអ្វីដែលគត់ចង់បានតែប៉ុណ្ណឹងlike នឹងview គាត់មិនខ្វល់ពីមនុស្សជុំវិញខ្លួនគាត់ទេ!"។

ក្រៅពីសាមីខ្លួនតារាចម្រៀង បានប្រតិកម្ម ភាគីខាងផលិតកម្ម ថោន ដែលស្ថិតក្នុងកម្មវត្ថុជាមួយគ្នា ក៏បានចូលខ្លួនមកដែរ។ លោក មាស សុខរតនៈ ដែលទើបវិលមកកាន់ការជាអ្នកគ្រប់គ្រងទូទៅផលិតកម្មថោនវិញ បានទាត់ចោលការលើកឡើងគ្មានមូលដ្ឋានដូចគ្នា។ "អ្ហើយ...ជាអ្នកសិល្បៈដូចគ្នា ទៅចង់ផ្ដួលគ្នា ផ្ដួលអី...អ្វីដែលយើងប្រឹងធ្វើដើម្បីតែភាពរីកចម្រើនយើងខ្លួនឯង អត់មានត្រូវទៅផ្ដួលនរណាទេ!"។ អ្នកចាត់ការដដែលបន្តថា អ្វីដែលផលិតកម្មផ្ដល់ជូន រ៉ាប៊ី នាពេលនេះ ក៏ជាអ្វីដែលផលិតកម្មផ្ដល់ជូនទៅតារាចម្រៀងផ្សេងៗក្នុងផលិតកម្ម គឺដូចគ្នា មិនមានបែងចែកឡើយ។ ដោយឡែក ចំពោះរឿង រ៉ាប៊ី ដែលកំពុងទទួលការចាប់អារម្មណ៍លើទីផ្សារ ក៏ដោយសារឱកាសផ្សំផង។ ដោយឡែកសមត្ថភាពវិញ លោកថា តារាចម្រៀងមួយៗ មានសមត្ថភាព ក៏ដូចជាសក្ដានុពលរៀងៗខ្លួនដែរ៕

អត្ថបទ៖ ទារិកា